YSRTP: షర్మిల దీక్ష భగ్నం.. దీక్షకు అనుమతి లేదని అరెస్ట్ చేసిన పోలీసులు!

YSRTP: రాష్ట్రంలో మహిళలపై జరుగుతున్న దాడులకు నిరసనగా ట్యాంక్​ బండ్ రోడ్డుపై దీక్షకు దిగిన వైఎస్ఆర్టీపీ అధ్యక్షురాలు వైఎస్ షర్మిలను పోలీసులు అరెస్ట్​ చేసి బొల్లారం పోలీస్​ స్టేషన్​కు తరలించారు. మంగళవారం మహిళా దినోత్సవం సందర్భంగా వైఎస్ఆర్టీపీ అధ్యక్షురాలు​ వైఎస్ షర్మిల హైదరాబాద్ లోని ట్యాంక్​ బండ్​పై రాణి రుద్రమ, చాకలి ఐలమ్మ విగ్రహాలకు నివాళి అర్పించారు. అనంతరం రాష్ట్రంలో మహిళలపై జరుగుతున్న దాడులకు నిరసనగా ట్యాంక్​ బండ్ రోడ్డుపై దీక్షకు దిగారు.

తొలుత విగ్రహానికి నివాళులర్పించిన షర్మిల తర్వాత రాణి రుద్రమ విగ్రహం వద్దనే తాను సాయంత్రం వరకూ దీక్ష చేస్తున్నట్లు ప్రకటించారు. షర్మిల దీక్ష, సంఘీభావంగా వచ్చిన ప్రజలు, ఆమె అనుచరులతో ఆ ప్రాంతంలో భారీగా ట్రాఫిక్​ జామ్​ అయింది. దీంతో అక్కడ దీక్షకు అనుమతి లేదని చెప్పిన పోలీసులు ఆమెను బలవంతంగా అరెస్ట్​ చేసి బొల్లారం పోలీస్​ స్టేషన్​కు తరలించారు.

అంతకు ముందు మీడియాతో మాట్లాడిన షర్మిల.. రాష్ట్రంలో కేసీఆర్​కుమార్తె, ఎమ్మెల్సీ కవితకు తప్ప ఎవరికీ భద్రత లేదన్నారు. విచ్చలవిడి మద్యం వల్లే రాష్ట్రంలో మహిళలపై దాడులు జరుగుతున్నాయని, దీనిపై కేసీఆర్ సమాధానం చెప్పాలని డిమాండ్ ​చేశారు. కవిత బతుకమ్మ ముసుగులో లిక్కర్​స్కామ్​కు పాల్పడిందని ఆరోపించారు. మహిళల మీద ఎంతో ప్రేమ ఉన్నట్లు మహిళా రిజర్వేషన్ల కోసం మాట్లాడుతున్నారని మండిపడ్డారు.